菜單
類別
【康子妮林曉峰離婚】阿Lo當年違背承諾棄前女友 一次登台撻著拍檔變老婆
2020-09-12 香港
結婚18年的康子妮(Lily)同林曉峰(阿Lo)驚爆離婚,向來二人俾外界印象都係家庭為重,難怪消息傳出令唔少人大跌眼鏡。婚姻結束成為娛樂頭條,Lily同阿Lo戀情嘅起點,都曾經惹人談論。

林曉峰本來有個拍拖多年圈外女友潘菁華,2000年潘製作玻璃工藝品時發生意外,導致上半身燒傷之餘更不幸毀容。當時阿Lo曾經喺醫院照料女友,又承諾會娶潘菁華,仲打算去澳洲舉行婚禮,但係未有成事。

2001年底,TVB派林曉峰同康子妮去澳洲為華裔小姐擔任司儀,多年前一篇訪問提到,阿Lo同Lily喺飛機上傾偈傾出好感。3個月後,林曉峰承認同潘菁華分手,強調冇第三者,阿Lo喺訪問入面提到「好憎自己轉變,但係又唔可以唔轉變」。至於結婚嘅承諾,阿Lo話「自己都控制唔到。我都覺得好可惜」。但係冇幾耐就有雜誌影到阿Lo同Lily拖手行街。

去到2002年6月,林曉峰同康子妮公開承認拍拖,而潘菁華接受傳媒訪問時話唔知道舊男友新戀情,仲大鬧二人「狗男女」。

亦係同一年嘅8月,同林曉峰拍拖冇耐嘅康子妮被人影到同食肆太子爺、「一碟歌手」曾國銘撐枱腳,盛傳曾發力追求Lily,而阿Lo就大方表示信任女友。

2002年尾,林曉峰同康子妮結婚,否認奉子成婚。三個月後,康子妮承認懷孕3個月,2003年9月誕下大仔林寶,隨後瞬即再有喜,2004年9月細仔林熙出世。由認識、拍拖、結婚到一家四口,前後3年唔駛,好快手!

發佈留言
*