香港連月來嘅反送中示威令TVB新聞報導手法備受質疑，不少大眾認為報導偏頗，亦有指新聞部員工為免「背棄良心」，有多名記者、主播紛紛遞信辭職。而深受網友愛戴嘅新聞小花之一嘅梁凱寧，係8月中傳出裸辭消息。不過日前就有網友係網上討論區「暗指」梁凱寧辭職嘅原因，係轉投考警務督察，最好搞到梁凱寧本人回應網友！
爆料網友雖然未有指名道姓直指梁凱寧考警察，但就俾咗tips係指該新聞女主播係接棒陳嘉倩主持《睇新聞·講英文》，亦即係梁凱寧。事件好快就傳入梁凱寧耳中，佢亦有係私人Facebook出post否認有關傳聞，「我無考警務督察，請勿散播謠言，說好的fact check呢？」
雖然已經梁凱寧親自澄清，但爆料網友仍然窮追猛打，直指對方背後有強大「後台」，就算體力唔合格仍然獲取錄。但好快其他網友就將爆料網友「起底」，指對方經常係討論區散播謠言，直言今次係抹黑梁凱寧。
