Maggie近日離職，話要休息一下，再決定去向。

　　《頭條日報》專欄「又中又英」作者褚簡寧（Michael Chugani），講新聞教人學英文，吸引好多粉絲，由報紙專欄登上公仔箱，為TVB主持節目「睇新聞學英文」，收視率好高，Kelly諗，除咗Michael作為英文報章資深編輯有料到，仲有佢個拍檔主持梁凱寧（Maggie）表現出色，都有關係。Michael同小妹報料，Maggie已離職，一班台前幕後工作人員都依依不捨。

Kelly成日睇「睇新聞學英文」，增進自己對時事嘅認識，又學番幾個英文生字，當然仲係捧老友Michael場，不期然亦都成為咗Maggie粉絲。Michael話，唔經唔覺同Maggie拍檔主持呢個節目兩年，伊人早前決定離職，話要休息一吓，再決定自己嘅去向咁話，小妹聽到好唔捨得。Michael都係咁話，佢話好拍檔真係唔易搵，佢哋兩個過去兩年合作愉快，形容Maggie對人好友善，從來無見過佢發爛渣，所以無論採訪部同事或者製作組人員，個個都同佢好friend，希望佢小休之後有更好嘅發展。

Maggie人緣好好，近日離開，人人同佢影相留念。小妹問Michael，係唔係再見唔到Maggie出鏡呢？佢話同小妮子錄影咗幾集「睇新聞學英文」，會稍後出街，大家仲會見到Maggie嘅倩影咁話喎。