黃雨下行山友勇闖石澗唔驚沖走 團友原來有被救前科

究竟幾時先落完雨?!!!

約好嘅戶外活動已經改期再改期,不過都有人堅係「風雨不改」,落雨照上山。

「山野龍咁威」專頁之前踢爆過大媽喺水塘游水事件,呢期又俾佢地搵到近日有幾名行山人士,唔理黃色暴雨警告,上山遠足,沿途仲要經過溪流。需知道,山溪會因天雨而山洪暴發,睇相亦見到水勢頗急,咁做有幾危險相信唔駛多講。喺呢班「逆流大叔」同「逆流大姐」當中,有位仲疑似手傷未癒,帶住護具;更有人喺溪上大石做拱橋……

有網友就留言,話原post相片入面其中一對男女,之前試過遠足被困大東山11小時,最後由救援人員帶離險境。唔……原post傳送門

呢單以外,「山野龍咁威」亦搵到2單天雨行山報料,先有一班大叔喺尋日(29日)暴雨天氣下,去到港島大潭篤水壩底嬉水。雖然嗰度唔係水塘範圍,冇污染食水亦冇犯法,但係一旦水塘放水,其實都幾危險。原post傳送門

另一單就係有教育團體喺黃雨情況下,帶成班小朋友上山玩水。不過呢個機構就事件作出澄清,天文台發出黃雨警告前已經離開溪澗,玩水嗰陣係下雨前,並且只係玩咗短時間。原post傳送門唔少人就以1955年造成28人死亡嘅「大埔滘山洪暴發事件」為例,擔心慘劇再現。

  1. 尚無回應.

  1. 尚無引用.