麥當娜明年2月香港開騷 最貴飛$4,000
適中字型
較大字型
麥當娜首次來港!準備要搶飛喇!
麥當娜首次來港!準備要搶飛喇!
麥當娜從來冇嚟過香港! (資料圖片)
麥當娜從來冇嚟過香港! (資料圖片)
57歲美國流行樂壇天后麥當娜（Madonna）出道咁多年，開過無數次演唱會，但一直冇去過台灣、香港同澳門開演唱會，曾經好多次香港娛樂公司好似英皇、寰亞同耀榮都傾過佢嚟開演唱會，但因為價錢太貴，一直傾唔成，但今次終於有轉機，獨家代理Madonna全球演唱會主辦權的Live Nation決定放期搞香港站演唱會，而且係由自己公司親自做主辦，日期定咗出年2月17同18兩日喺亞洲博覽館做，票價初定會分4類，最貴嘅VVIP座位賣4000元，普通VIP座位就賣3000元、中價票約賣2000元同最低票價1000蚊。
雖然票價幾貴，不過之前英國樂隊One Direction同意大利失明男高音Andrea Bocelli嚟港開演唱會，前者賣成3488元，後者就賣3980，幾乎同娜姐同價。之不過以麥當娜嘅號召力，佢第一次嚟香港開騷，點貴都一定有人捧場，其實娛樂圈中人已四出打聽幾時有飛訂，睇嚟Live Nation大中華總裁洪迪又好唔得閒，一定唔少圈中人搵佢訂飛。
香港做完之後，娜姐接住會喺2月20、21日去澳門新濠天地開兩場，聽講新濠老闆主要想以搞麥當娜演唱會振興賭場生意，所以係用一個天價打低太陽娛樂公司，搶到澳門主辦權，不過佢哋打算大部份飛會用嚟送俾啲客，少部份飛先會攞出嚟賣，所以依家佢地都未定出票價賣幾多錢。
接住2月24、25日會去菲律賓馬尼拉再做兩場，3月再殺入去澳洲做6場，3月12、13日喺墨爾本做兩場、19、20做悉尼、26、27做布里斯本。而台灣站原本排喺菲律賓後，但後來又唔想娜姐唱完又兜番轉頭咁辛苦，台北站就改喺2月頭做，依家Live Nation喺台灣入咗2月1至9日期，等政府批其中兩日期俾佢哋。今日本報問咗香港Live Nation公關嚟香港開演唱會嘅事，佢哋就回覆話：「未落實，唔講得！
