hoka one one

Archive for 2018 年 6 月 12 日

二仔結婚 榮升做奶奶 薛家燕 豪送百萬金器包酒席

昨日係薛家燕兒子石耀庭與女友陳素怡(Zoe)結婚嘅大日子,家燕媽媽榮升做奶奶喇!

大家都好期待家燕姐着上招牌黃袍登基衫榮升做新奶奶,但早上家燕姐揀著奶奶褂興奮娶新抱,,開心到見牙唔見眼。榮升奶奶的她好錫新抱,豪送過百萬金器畀佢,當中包括兩對合共40萬的龍鳳鈪、巨型金豬牌、金鍊等,而酒席都係家燕姐包辦埋單,佢雖然未肯透露金額,但話娶新抱最緊要開心…

薛家燕 非常恨抱孫

石耀庭早上先到尖沙嘴洲際酒店接新娘,下午在酒店進行證婚儀式,晚上在大禮堂設婚宴,筵開53席!榮升奶奶嘅家燕姐戴上玉器及金首飾,捧著金豬牌與一對新人合照!

為阿仔親自辦婚事的家燕姐,送樓送首飾、包辦兩場盛大婚宴等,夾夾埋埋豪擲4千萬娶新抱。而呢位超級奶奶的行頭十足,她身上一套翡翠頸飾、手鈪和指環,同新娘子一樣咁搶!

家燕姐話:「我同個仔講,最緊要愛錫老婆,佢都好乖,要繼續生性,兩公婆要容忍,錫多啲老婆,新抱好錫我個仔,好細心,個仔好有福氣。(一串六隻金豬係咪有寄語?)新抱都唔明乜嘢意思,我聽老人家講,買一排豬可以生多啲,但其實一、兩個都OK!」睇嚟佢真係非常恨抱孫呀!
一對新人表示會努力造人生B,新郎亦笑言:「我會努力,想生一、兩個,但依家暫時一個先,都要為事業努力!(有冇送啲乜嘢畀媽咪?)送咗自己畀佢!」

新娘子頸上的金豬、重量級的龍鳳鈪等,可謂閃爆全場,單是新娘手上的一對重量級「流星錘」龍鳳鈪,已超過港幣30萬,全身行頭近百萬!

家燕姐豪娶新抱,親家梗開心,新娘出嫁一刻緊抱媽媽,相當溫馨!

新郎方面的「戥穿石」亦很熱鬧,今早一對新人出閣,除了名車出巡,更有大紅花轎迎親,派頭十足!

踢轎門

出門喇!

提到囝囝石耀庭(Jackson)和新抱Zoe早上敬茶令她感觸,她不禁眼濕濕,感覺終等到這一日,坦言下午簽紙儀式一對新人講誓詞一剎那更是喜極而泣,身旁的襯家都一樣,還自言只哭了兩次。

 

除了昨晚的婚宴,本月16日石耀庭會再搞派對,薛家燕話:「真係唔好意思,個仔今晚得一圍!」石耀庭續說:「係呀,所以只係請最熟嘅朋友嚟,16號會喺尖沙咀搞一個派對,請番自己嘅朋友,年輕人為主。」

一對新人晚上於尖沙嘴洲際酒店大禮堂設婚宴,筵開53席,家燕姐於圈中一向人緣好,到場嘅賓客都係份量十足,其中「七公主」當中蕭芳芳、陳寶珠、岑芝華、王愛明、馮素波齊到賀,一對新人向5位長輩敬茶。

一對新人石耀庭與陳素怡於台上發表感言,陳素怡首先感激父母及公公、婆婆,指自己儼如有兩對父母,一直獲他們愛護及照顧,即使自己性格任性也一一包容,當中婆婆由細睇到她大,又陪她到英國求學,每日教她中文,又給她煮飯,說到此時,素怡已淚流披面,耀庭見狀即為她遞上紙巾。

徐小鳳表示今晚是她出席最感人的婚宴,由頭到尾每一個字都好感動,特別是一對新人及薛家燕致辭,而她自己都一直抹眼淚,也見到薛家燕都開心到落淚!

佘詩曼出席婚宴時表示好戥家燕姐開心,她透露早前於白雪仙的壽宴中見到家燕姐,阿佘謂:「我嗰日都有問家燕姐,一日擺唔擺得晒,佢話要擺兩日,仲話阿仔投訴佢分得圍數少。」問到何時到她,她即笑住表示要開席閃走。汪明荃單拖到場,她表示:「因為老公羅家英到咗拉薩登台,今晚先返,應該嚟唔到,但家燕姐娶新抱喎,我一定要嚟啦!(送咩禮?)送現金最好,因為唔知一對新人鍾意啲乜嘢!其實今晚好開心,大家都知佢經歷唔簡單,又係單親媽媽,而啲仔女又咁乖,今晚佢娶新抱真係好戥佢開心!」