戴祖儀肉搏丁子朗 激到瞓地
戴祖儀於新劇與丁子朗有連場激情戲，她形容拍到「瞓落地」。至於劉穎鏇透露相隔5年再次以泳裝亮相螢光幕，被祖儀大讚索到暈！
戴祖儀、劉穎鏇（Tiffany）、余德丞（Dickson）、丁子朗及黎燕珊等，昨日現身電視城出席新劇《青春不要臉》開鏡拜神。Tiffany飾演選美出身、於娛樂圈平步青雲的女生，問到是否需穿泳衣拍攝？她笑言：「有，不過係80年代一件頭。」祖儀即搭訕：「有本錢梗係唔怕騷出嚟啦！」
祖儀透露與丁子朗有多場激情戲：「已經拍咗一場，仲要拍到瞓落地。（獻螢幕初吻？）唔係，係『螢幕二吻』，初吻已喺《刑偵日記》獻出咗。」又指與Tiffany僅得一場對手戲，為男生出頭吵大鑊：「不過唔係爭仔呀！」
黎燕珊爆余德丞突然除褲
丁子朗與Dickson飾演沙煲兄弟，2人稍後要穿三角泳褲拍落水戲，已積極操肌。Dickson說：「今次製作好認真，唱歌同跳舞場面包羅萬有。」丁子朗則說：「開工一個月前我哋要排舞，仲難過依家啲韓團，因為幾十人一齊跳。（你同祖儀多激情戲？）係人生首次同拍檔最親密嘅接觸。」Dickson表示先後與Tiffany及伍樂怡發展感情：「丁子朗佢哋係乾柴烈火，我哋只係淡淡然咋！」
至於黎燕珊演Dickson的媽媽，大讚對方專業：「拍咗場戲講佢突然失控，喺我哋面前除褲，佢真係豁咗出去！」
只要劇情需要，劉穎鏇不介意性感演出。
