hoka one one

Posts Tagged ‘ Berkeley

真人版米開朗曾江原來好犀利

無綫搵謝賢(四哥)、胡楓(修哥)Joe Junior加埋曾江(Ken)去莫斯科及聖彼得堡拍攝真人騷《四個小生去旅行》,喺記者會四哥仲扯火狂數Ken哥不是,期間仲發生四哥掌摑曾江事件,節目未出街就已經話題性十足,星期一首播更錄得平均及最高收視26點,成為今年暫時10點半檔期收視最高節目。

因為四哥嘅一巴,令大家重新關注被摑嘅Ken哥。我諗喺呢一巴之前好多年輕嘅朋友對Ken哥嘅認識只限於某個令你頭髮立即變黑嘅染髮劑廣告,但原來呢位當年當紅嘅小生真係好架勢㗎!

原來80歲嘅Ken哥當年14歲嘅時候跟家人移居香港,家住西半山巴丙頓道豪宅,中學畢業於九龍華仁書院,冇靠父蔭咁拎獎學金去咗美國名校加州大學栢克萊分校(University of California, Berkeley)修讀建築系。畢業後回流返香港,自己開公司,做咗建築師三年。

但點解之後做咗明星?原來佢唔鐘意應酬傾生意,而且仲覺得讀書唔係為咗起啲毫無美感嘅建築物。之後轉行做演員,憑住外貌、演技令到Ken哥獲得「全能演員」嘅稱譽。Ken哥從影五十幾年,參演電影及電視多不勝數,而且角色種類繁多,今年佢仲憑《竊聽風雲3》中精湛嘅演技喺金像奬奪得最佳男配角。

Ken哥仲精通各種運動,足球、籃球、羽毛球網球等等佢曾經係新加坡國家草地滾球隊隊員,喺96年仲代表新加坡去咗澳洲參加世界盃。Ken哥高大靚仔、運動勁、有家底、有學識又有演技,絕對係人生勝利組嘅代表,Ken哥實在太厲害太屈機啦!

另外,有網民發現Ken哥嘅建築師之路同無綫岩岩播完嘅《鬼同你OT》入面嘅米開朗(陳豪飾)好相似。劇中,米開朗又係畢業於名牌大學,擁有豐富嘅創作力,但又不屑去設計啲俗套嘅建築物,而且米開朗都係有啲公子哥兒/藝術家性格。曾江簡直係真人版米開朗!唔知編劇係咪俾人生贏家Ken哥而啟發佢創作咗米開朗呢個角色呢?