八字眉被嘲要整容 黎明女新人JC 長文自嘲
明蝠俠黎明本來就秘密簽咗新人JC，仲畀網民笑佢專簽J 字女仔做旗下藝人。講返JC，公司一早就將佢唱嘅歌擺上網，仲得到唔少網民支持，但係巴打們又點忍到手對佢起底呢？不過，神秘面紗一揭開，唔少人就笑JC嘅八字眉，話晒都18歲妹妹仔，當然都好hurt啦。
雖然唔少網民撐JC有好歌喉，但就對佢外貌就話唔及過往黎明所簽嘅女歌手，仲有人笑佢要執吓個樣先出道。
小妹妹JC就忍唔住氣，喺facebook打咗篇文回應：
「可能大家會覺得我咁post好唔成熟，岀得黎行預左啦有咩好怨。
我只係想講，從一開始，冇人話過我係一個靚女，冇人話過我好高好瘦
究竟幾時開始，唔靚就注定你一事無成，唔靚就失敗硬，唔洗諗？
其實我真係知可能我外表真係唔岀眾，但我自問有努力，喂！點都執到順眼啲先見人啦係咪？
我點會唔知，但有啲嘢天生嘅我改唔到，咁我咪努力啲做好其他方面嘅野囉，例如唱歌咁！
我信總有人欣賞嘅，但事實似乎同想像中唔同？
身體髮膚受諸父母，樣貌身材高度，唔係我決定。
我話我冇怨過就呃你嘅，不過我就已經接受左啦！
如果我個樣真係過份不堪令到你唔舒服嘅，我好抱歉，我只係想唱歌….」
雖然長篇大論係咁呻，睇落都幾無奈，不過小妹妹都未出道就要被唔識嘅人批評，梗係唔開心。但之後佢又好阿Q咁晒咗張圖話：「嗱！唔好嘈啦，依家比你揀，想我修邊隻眉？」
望完張圖，真係笑咗。睇嚟JC妹妹EQ都好高嘅。
