港隊劍擊手張家朗贏得金牌全城振奮,但係賽後TVB主持陳約臨(Kelly)訪問張家朗嘅環節,就睇到唔少觀眾「熱血沸騰」,鬧佢問題無聊、打斷張家朗發言,又大叫「我好鍾意你呀,點算?」,表現唔夠專業。
25歲嘅Kelly雖然年紀輕輕,但原來本身有唔少主持經驗,甚至喺大專教主持技巧,點解今次咁失控?因為見到「家朗奪金真的很興奮」?
喺上海出世嘅Kelly小學時期到香港生活,細個已經對幕前工作充滿興趣,參加社區中心嘅小主持訓練計劃﹕後來入讀珠海學院新聞及傳播系,不過佢入行唔係靠做主持,而係選美。2016年Kelly被睇中成為國際小姐香港代表,仲贏到亞洲皇后殊榮。後來佢簽約TVB,主要係做主持,參與過唔少體育節目,2018年平昌冬奧佢都有份。近年就多數主持時尚同旅遊節目。