葉巧琳(Mischa)最近推出新歌《殘渣》,講曾不被男友重視仲要當為「殘渣」,結婚叫你去贈興。原來她都試過去前度同好友的婚宴,不過好彩大家並非不歡而散,但她好明白變成「殘渣」的感受。她跟現任男友已拍拖9年,兩人早已像老夫老妻,她還很感激男友一直好支持她繼續在圈中追尋夢想。

新歌裏的慘情狀況,Mischa認為現實亦有可能出現,因為這個世界確實有不少「賤男」在身邊。「我相信總有戀愛關係係好似個女主角咁樣,男友對佢好差,甚至仲要同自己嘅好朋友結婚,都仲要叫埋你去飲,完全當你係『殘渣』咁看待。」

同男友似老夫老妻

Mischa之所以肯定現實會發生,只因她都有類似經歷,「我都試過去前男朋友嘅婚宴,仲要係同我好朋友結婚,不過我哋係和平分手,佢係分手之後先同我朋友一齊,所以嗰日去婚宴唔會尷尬嘅,不過我演繹《殘渣》時,都有攞番小小呢個感覺去投入,去為前度贈興確係會有『殘渣』嘅感受。」

不過現實Mischa好難有機會做「殘渣」,因為她跟現任男友已拍拖9年,仍然好鬼甜蜜,仲已同居生活,「我哋一齊咁耐都冇乜嗌過交,可能我哋性格好唔同,反而可以互補不足,佢仲好支持我喺圈中發展。(幾時結婚?)仲未有計劃,不過我哋依家都好似老夫老妻咁,等大家事業再穩定啲先算啦!」