唔願同阿Yu離婚 周永恒攬巨胸新歡相曝光
自嘲人渣嘅周永恒（Roy）早前背妻偷食，老婆趙頌茹（阿Yu）更爆二人分居後，周永恒唔肯簽紙離婚，仲喺facebook留言講自己嘅宗教信仰，婚姻係一生一世嘅事，希望呢件事有冷靜階段。
點知講完唔夠一個禮拜，讀者陳先生透過《蘋果》爆相爆片報料，踢爆周永恒又有新歡，呢個女仔叫黃詠珊(Cherie)(另外在fb顯示為黃芊詠)，更指佢喺網上疑涉錢債糾紛。讀者陳先生提供嘅相片所見，周永恒同Cherie攬埋一嚿黐頭芒合照，真係好煙韌、好親密，陳先生接受訪問話：「Cherie之前學打碟，之後去咗第二間公司，搞咗隊o.m.G組合，成日話今年會出道，仲喺尖沙嘴嘅酒吧出騷跳舞，聽講o依家周永恒做咗佢經理人，佢仲同周永恒一齊住，Cherie喺fb貼咗見唔到周永恒樣嘅相，話呢個男人永遠喺佢背後。」陳先生仲話：「佢好鍾意出名，又特登黐埋劉馬車，喺fb tag名話喺劉馬車屋企打邊爐，又同錢國偉影相。」陳先生又爆Cherie疑變面，話佢以前塊面好肥。本報致電Cherie求證，但電話冇人接聽，最近同周永恒合作歌曲嘅rapper曲赤，被問到識唔識Cherie？曲赤接受電話訪問表示：「佢打碟㗎，我哋之前合作過演出。」問到周永恒係咪同Cherie拍拖同居？曲赤話：「又拍拖？係咪拍MV咋，我唔係好知佢哋係咪拍拖喎，因為我同佢傾緊合作出歌。」另外，阿Yu透露經理人回應《蘋果》：「阿Yu不會對周先生的私生活作任何回應，謝謝大家。」
尚無回應.