彈床被踢歪鼻 陳瀅唔怕素顏見猷亨
「宅男女神」陳瀅呢日以短裙仔出席復活節活動，仲即席試玩跳彈床，不過佢跳得都有啲hea，佢解釋因為著咗短裙，所以唔係好想起腳踢。
陳瀅又自爆16歲嗰年，同幾個學跆拳道嘅師兄邊打拳邊跳彈床，最後被對方踢中面：「當時初學跆拳道，覺得好威，就撩對方上去踢，我哋邊跳邊玩花式，點知其中一個師兄一腳踢中我塊面，我即刻喊，第一次被人打，我個鼻有少少歪都可能因為佢，不過佢都覺得唔好意思，事後都有畀我用手打咗幾下。」
有記者發現陳瀅左手手腕貼上藥水膠布，佢解釋喺溫哥華時被貓爪傷：「啲人以為割脈，為免誤會，所以先貼上膠布。」
陳瀅喺活動前一天先由溫哥華返香港，佢話去溫哥華係為咗探婆婆，不過男友何猷亨就冇同埋佢一齊去：「之前請咗一星期假，返去探下婆婆，因為婆婆有腎病，不過我自己一個返。佢都知我拍拖，冇話特別覺得點，因為我主要係帶婆婆睇醫生，好擔心佢健康。」
提到陳瀅四月要拍新劇，佢話唔擔心會同男友少咗機會見面：「同一個城市都比較好，我又唔係飛去第二度。」有網民話佢素顏好正，佢坦言非常開心：「我見到報道都好開心，其實素顏唔容易，我對皮膚同個樣都做足護膚療程，我覺得係冇醜女人，只有懶女人。」又話男友都有見過佢素顏：「所有屋企人、朋友都見過，我返到屋企會即刻落妝，同埋多飲水、瞓覺。」
尚無回應.