日本中學生玩到冇嘢玩，居然學人玩弄感情!根據日本網站Livedoor報道，早前神戶一個討論手機應用嘅論壇上，有中學生指出最近流行透過Line向同學「ウソ告（假告白）」，如果對方接受，當事人就會回應「呃你咋!」，好似玩遊戲咁，被騙者就係loser!

年紀輕輕就學人欺騙感情，真係好唔要得!當你全情投入去愛一個人，點知遇著個絕世玩家，實元氣大傷!唔想做蠢女人被男人玩，發覺對方有齊以下特徵你就要小心:

1.口才好

男人把口叻，確實係好易埋女人身。但試諗吓，當佢氹得你開心時，佢一樣好易氹其他女人開心，你好大機會係咁多個女仔入面嘅其中一個咋。

2.好難約

Player有咁多lovers，點會咁得閒成日約你?如果佢成日都係即興約你，睇怕佢係因為同其他女伴原先嘅約會取消咗，先搵你攝時間。你想約佢?sorry，佢通常唔會聽你電話，又或者短訊隔好耐先覆。

3.記錯細節

同咁多女人有關係，搞錯細節都唔出奇，如果佢成日唔記得同你講過啲咩，又或者重複同你講同一句說話，唔係佢記性差，係佢同太多人講過類似嘅嘢。

4.手機跟身

你唔會有機會睇到佢部電話，更加唔駛旨意會開到佢fb、email嚟睇。騙術更高明嘅player，會光明正大畀你睇佢部手機!點解?因為佢手機都有幾部，你睇到只係好「正常」嘅一部咋。

5.冇熟朋友

Player唔會主動介紹朋友你識，就算真係畀你識到，你都唔會同佢哋熟絡到，妄想喺佢朋友堆口中知多啲關於佢嘅嘢。