hoka one one

Posts Tagged ‘ 一日遊

【復活節好去處】銅鑼灣+灣仔親子一日遊 歐陸風市集+復活兔小盆栽班+7折嘆復活節自助晚餐

 【復活節好去處】銅鑼灣+灣仔親子一日遊
【復活節好去處】銅鑼灣+灣仔親子一日遊

重有幾日就到復活節五連休,諗好親子節目未呢?今次介紹大家到銅鑼灣及灣仔一帶,先到銅鑼灣參加歐陸風市集及親子復活兔​插花​班,再到全新的灣仔渡輪碼頭畔主題區打卡,以及嘆復活節自助晚餐,一日集齊食買玩兼打卡四大元素,大人細路都有個難忘的復活節了!

利園歐陸風市集 30間市集攤位+打卡位

利園於4月2日至4日期間,舉行全新「復活.遊世界」利園戶外市集,市集以歐陸風為主題,到時利園一期外的希慎道將變成由小木屋砌出的歐陸市集,結集近30間市集攤位及打卡位「環遊世界指南」,當中有芬蘭朱古力、印度首飾配件、韓國金屬系飾物、日本職人手工啤酒、埃及風格主題手工香薰蠟燭、法國有機花茶等,讓大家不用出國都可以買到各國精品。

「復活.遊世界」利園戶外市集
日期:2021年4月2日至4日
時間:中午12時–晚上7時
地點:銅鑼灣利園一期地面私家路
費用:免費入場

前往方法:從港鐵站銅鑼灣F1出口步行3分鐘

親子復活兔小盆栽班

復活節想同小朋友一齊DIY復活節禮物,可以參加復活兔小盆栽班。一個小時的課程內,大人細路需要揀選自己喜愛的花材,再夾手夾腳設計屬於自己的復活兔小盆栽,訓練大家的合作性之餘,亦可培養小朋友耐性、專注力。課程頗受歡迎,4月4日已滿額,想參加的話,4月3日(星期六)有三個時段可供選擇,有興趣記得及早報名。

Smooch Floral Design
日期及時間:4月3日(星期六),11:30am-12:30pm | 1:30-2:30pm | 3:30-4:30pm
地點:銅鑼灣富明街2-6號寶明大廈4J
費用:$380(一位家長 + 一位小朋友)
查詢 : 9789 9264

前往方法:從港鐵站銅鑼灣A出口步行3分鐘 / 從利園一期步行3分鐘

灣仔海濱全新打卡位 霓虹燈相框/木系構築物

灣仔碼頭海濱的「渡輪碼頭畔主題區」宣布進一步開放。今次開放的休憩用地,位於香港會議展覽中心至灣仔碼頭之間,設計為簡約的清水混凝土和木系構築物,更引入一個個宛如照片框的型格裝置,還有將「灣仔道」、「巴路士街」、「星街」等充滿香港特色的街道名稱化作霓虹燈相框,打造大量打卡位,大家不妨散步睇海景的同時,記得好好打卡啦。

「渡輪碼頭畔主題區」
地址:香港會議展覽中心至灣仔碼頭之間

前往方法:從港鐵站灣仔A5出口步行10分鐘 / 從Smooch Floral Design 步行約20分鐘

鮑魚+花膠自助晚餐 3月31日前預訂7折

最後一站,可如來個復活節自助晚餐! 灣景國際的灣景廳於4月2至6日推出復活節自助晚餐,提供十字包、魔鬼蛋、蘇格蘭蛋、甘筍蛋糕等應節食物,每位小朋友於用餐當日將得到小玩意1份。自助晚餐以「鮑魚.花膠」為主題,以澳洲鮑魚及非洲和挪威花膠入饌,回本菜有避風塘金磚脆鮑魚、鮑魚花膠燒鴨粥、花雕醉鮑魚,還多款冰鎮海鮮如加拿大雪花蟹腳、新西蘭生蠔、鮮蝦、鮮蜆等。價錢為成人$588、長者$548、小童$488,3月31日前預訂可享7折優惠,相當抵食!

灣景廳
地址:灣仔港灣道4號灣景國際1樓
電話:3909 9088
前往方法:從港鐵站灣仔A5出口步行8分鐘