【晴報專訊】無綫全新飲食節目《區區開伙》找來安德尊（大王）與李錦聯（李師傅）跳出《都市閒情》，走勻全港18區覓食，首集更請來朱千雪任嘉賓。不少網友狂推無敵鴛鴦鏟再現超爆笑；有人則嫌二人舊酒新瓶冇新意！

長壽婦女節目《都巿閒情》的老拍檔安德尊、李錦聯，去年初再度合體主持烹飪環節《今晚食乜餸》，合力炮製一味「金不換蜜汁龍蝦」，你一言我一語勁有火花，「駁火」短片於網上炒出數十萬點擊率，之後更煮餸煮到登上《100毛》封面。其後，他們多次在節目中合體，也獲觀眾Like爆，成為一時佳話，個個留名等睇TVB開節目畀無敵鴛鴦鏟狽飛，預期收視必定「靠得住」。

嘲大王上唔到位

近日，大王與李師傅首度合作主持的飲食節目《區區開伙》前晚首播，兩位《都巿閒情》代表人物率領觀眾游走18區「食好嘢」，第一集空降旺角，並與美女調解員朱千雪「掃街」，品嘗雞蛋仔、臭豆腐及滷味，食盡香港地道風味。

無敵鴛鴦鏟載譽歸來，霸氣十足的大王於第一集大部分時間慘變下靶。佔盡上風的李師傅，度出不少抵死押韻的對白玩謝拍檔。好像李師傅介紹千雪BB出場時，聲稱諗起與大王一齊做節目、一齊食飯已「頂唔順」，又取笑大王食滷味也要落茄汁；三人食雞蛋仔時聞到香味，李師傅又嘲諷大王「就快香（死亡）」，言語間句句有骨。

另外，節目尾聲時，安德尊和李錦聯一齊同千雪BB試食佛手柑雪葩，見到碟上的螺絲及螺絲帽形朱古力，大王成功表演上螺絲帽乘機認叻，李師傅卻一句KO拍檔：「如果咁就叫上到，難怪你上唔到位啦！」不少網友睇住李師傅「開火」大呼過癮，高喊好笑有火花；另一方面，有口痕友卻狠批二人舊酒新瓶，翻Loop舊蹺欠誠意。

此外，大王與李師傅於第二集將到觀塘搵食，更獲憑《EU超時任務》彈出的Zoie（譚凱琪）做嘉賓，未知屆時是否輪到大王發威。

撰文：Steven、Pat

協力：陳子楠

插圖：何樂

編輯：黃寶恩

設計：鄧俊明