鄭丹瑞孖娜姐上演父女戀 想請三大美人出山
鄭丹瑞為新戲《小男人周記3吾家有囡33D》宣傳，呢套電影亦係佢事隔25年後再拍《小男人周記系列》，佢又自爆今次係膽粗粗咁決定自編自導自演：「以前拍係有嘢想講，之後都覺得無咩值得拍，但依家有下一代，想用小男人方式講寫實啲嘅嘢」佢又話新片入面嘅「小男人」係一個有錢男人，不過一直都唔敢面對自己，直到個女再次出現。
鄭丹瑞又話請到女神周秀娜再度合作：「我上得台就當簽咗呢部戲，依家先敢講女神會演出。」原來之前兩人合作完《分手100次》後，鄭丹瑞就好欣賞周秀娜，仲封咗娜姐做女神，佢喺台上仲拖實娜姐跳舞，又話已經安排咗床上戲：「上次就佢同鄭伊健，今次同我！佢做我情人，仲會有有床上戲！不過我已經得到老婆及囡囡同意！」
鄭丹瑞又話會跪求當年有份演出小男人系列嘅鄭裕玲參演新片：「知佢講過唔再拍，但問10個人15個都叫我一定要請dodo，我仲想搵埋李美鳳同關之琳！」
至於周秀娜就話，自己一向都好鍾意對方，今次合作已經「恨咗好耐」，仲話細細個睇《小男人》系列時，都冇諗過自己可以做到「梁寬」嘅情人。
