《尚氣》男主角劉思慕 唔駛10年由德勤會計師變爆肌Marvel新英雄
《尚氣》男主角劉思慕 唔駛10年由德勤會計師變Marvel新英雄
早兩日Marvel新片《尚氣與十環幫傳奇》首條預告片出街，香港觀眾多數留意梁朝偉嘅戲份，以及落足眼力睇吓陳法拉喺邊。至於飾演主角「尚氣」嘅加籍華裔演員劉思慕(Simu Liu)，就飽受負評，好多人話唔識佢，又或者嫌佢唔夠靚仔，點解竟然可以打敗彭于晏云云。
早喺前年公佈劉思慕會做《尚氣》男主角之後，網上已經出現呢類負評，連劉思慕都出過個tweet問Siri自己係咪好醜樣。不過Marvel 揀人向來有一手，當日夠冇人相信Robert Downey Jr 勝任Ironman男主角，結果？唔駛問啦。
今年32歲嘅劉思慕生於中國哈爾濱，父母係工程師，喺佢幼年時就去咗加拿大讀研究院，到5歲先接返劉思慕去加拿大安大略省生活。雙親都係高學歷人士，所以對Simu好高要求，而Simu亦都喺名校西安大略大學商學院畢業，一出校門就已經有offer，仲要係大型會計師行德勤。
不過做唔夠一年劉思慕就被裁員，之後佢決定轉行做演員，話咁快就有公司簽仲有job接。除咗做特約演員，有學過跆拳道同詠春嘅劉思慕仲會做替身同特技人，就連編劇都做埋。李施嬅有份演出嘅加拿大劇集《血與水》(Blood and Water），其中一季就係劉思慕有份寫劇本。而劉思慕同李施嬅都係簽俾同一個美國經理人。
真正令劉思慕為人認識嘅係加拿大電視劇Kim’s Convenience，以多倫多一家韓國人家庭經營嘅便利店為背景，劉思慕飾演同老豆不和嘅大仔。劇集喺當地幾受歡迎，由2016年起播放，連續拍咗5季。
2019年Marvel公開徵求《尚氣》男主角，要求係30歲以下華人，當年嘅劉思慕剛剛符合年齡要求，亦解釋咗點解彭于晏、李治廷同吳彥祖點解冇份。爆肌身型加上有武打根底，2019年7月Marvel正式宣佈由劉思慕出任《尚氣》男主角。
